A2 CNN dhe A1 Info raportojnë për një aksident tragjik që i mori jetën futbollistit të njohur të Liverpool-it, Diogo Jota, pas një përplasjeje fatale në veri të Spanjës. Ngjarja ka ndodhur në orët e para të mëngjesit të së enjtes, në autostradën A-52, pranë qytetit Cernadilla, në afërsi të Zamorës, jo larg kufirit me Portugalinë.

Sipas raportimeve paraprake, dyshohet se një nga gomat e supermakinës Lamborghini që drejtohej nga Jota ka shpërthyer gjatë një parakalimi me shpejtësi të lartë. Si pasojë, automjeti doli nga rruga, u përmbys dhe shpërtheu në flakë.

Shërbimet e emergjencës u thirrën menjëherë në vendngjarje, por fatkeqësisht nuk arritën të shpëtonin jetën e Diogo Jotës dhe një bashkëudhëtari, i identifikuar si vëllai i tij.

Pamjet e publikuara nga mediat spanjolle, të siguruara dhe shpërndara nga A2 CNN, tregojnë skenën dramatike të aksidentit – mbetjet e djegura të Lamborghinit të përmbysur në anë të rrugës, ndërsa ekipet hetuese të emergjencës analizojnë vendin e ngjarjes.

Në video duken qartë gjurmët e gomave, të cilat tregojnë trajektoren e automjetit deri në përplasjen fatale. Copa të barrierës qendrore janë shpërndarë në tokë, ndërsa makina ka përfunduar jashtë rruge në flakë të mëdha.

Raportimet vazhdojnë të vijnë nga mediat spanjolle, ndërsa autoritetet janë duke hetuar shkaqet e plota të aksidentit.