Për ta kuptuar aftësinë e partive politike, për ta kuptuar dashurinë e tyre për qytetarin dhe për Preshevën, mjafton ta lexoni këtë shkrim. Partitë, për kalkulim votash, dalin publikisht të ftojnë për ndihmë në administratë antarsinë – por kur digjet mali, mungojnë plotësisht.

Zjarri që përfshiu pishat në fshatin Corroticë ditët e fundit ishte më shumë se një incident – ishte një pasqyrë dramatike e mungesës së përgatitjes dhe neglizhencës institucionale që ka kapluar Preshevën prej vitesh.

Në një kohë kur fatkeqësitë natyrore dhe emergjencat njerëzore po shtohen me intensitet dhe frekuencë, është e pafalshme që qytetet tona të mos kenë as minimumin e organizimit për të reaguar.

Kush reagoi i pari në Corroticë? Qytetarët. Ata me duar, me shata, me frikë dhe pa mjete. Sepse shteti ishte larg, institucionet nuk funksionuan, dhe sistem për mbrojtje civile… nuk ekziston.

Mbrojtja civile nuk është luks. Është domosdoshmëri. Dhe është detyrë e përbashkët – e shtetit, e shkollës, e komunitetit dhe çdo qytetari.

Por realiteti në Preshevë është alarmues:

• Nuk ka asnjë strategji serioze për edukimin qytetar në rast fatkeqësish.

• Shkollat nuk ofrojnë trajnim bazik për sigurinë.

• Qytetarët nuk dinë si të veprojnë në rast të zjarreve, përmbytjeve apo emergjencave të tjera.

• Politikanët e nivelit lokal shpesh e përdorin pushtetin vetëm për interesa elektorale, ndërsa çështjet e sigurisë publike mbesin në harresë.

Të rinjtë tanë dinë çdo trend në TikTok, por nuk dinë të shuajnë një zjarr, të montojnë një çadër, apo të mbijetojnë përkohësisht në kushte ekstreme. Nuk është faji i tyre – është mungesë edukimi, përgatitjeje dhe përgjegjësie nga institucionet.

Rasti i Corroticës duhet të shërbejë si një pikë kthese. Nëse nuk mësojmë nga ky zjarr, nga kjo humbje e natyrës, atëherë jemi duke e përsëritur gabimin me sy hapur.

Prandaj, Redaksia e A1 Info i bën thirrje të drejtpërdrejtë:

📌 Pushtetit lokal në Preshevë – të nisë menjëherë organizimin e strukturave të mbrojtjes civile me përfshirje të qytetarëve vullnetarë.

📌 Shkollave dhe institucioneve arsimore – të integrojnë edukimin për reagim ndaj emergjencave në programet e tyre.

📌 Organizatave dhe rinisë lokale – të bashkëpunojnë, të organizohen dhe të kërkojnë hapur ndryshim.

📌 Qytetarëve – të mos presin fatkeqësinë tjetër, por të bëhen pjesë aktive e ndryshimit.

Ne nuk mund të mbështetemi vetëm te zjarrfikësit kur digjet e gjithë struktura e përgatitjes. Mbrojtja fillon nga vetja, nga shkolla, nga komuniteti – dhe mbi të gjitha nga vullneti për të mos e pranuar më heshtjen si normalitet.

Koha për veprim është tani. Nesër mund të jetë vonë.

A1 info