Në një deklaratë publike, kryetari i APN-së, Visar Memeti, ka ngritur akuza ndaj udhëheqjes komunale lidhur me vazhdimin e projektit për ndërtimin e trotuarit në qytet, duke e cilësuar atë si problematik dhe të lidhur me parregullsi në procedurat e prokurimit.

Sipas deklaratës së tij, më 10.10.2022, gjatë periudhës kur Alternativa ishte në pushtet, ishte ndërprerë kontrata me një kompani të angazhuar për rregullimin e trotuarit. Si arsye përmendet mospërmbushja e obligimeve kontraktuale dhe, sipas tij, cilësia e dobët e punimeve të realizuara.

Megjithatë, Memeti pretendon se muajt e fundit, për vazhdimin e të njëjtit projekt, udhëheqësit komunalë Ardita dhe Ragmija kanë lidhur kontratë me të njëjtën kompani, të cilës më parë i ishte ndërprerë kontrata për të njëjtin projekt. Ai gjithashtu pretendon se kontrata e re është dhënë pa procedurë të rregullt tenderuese, por në formë të përshpejtuar.

Sipas tij, kjo kompani do të duhej të ishte në listën e zezë të Komunës për shkak të mosrealizimit të mëhershëm të punimeve, ndërsa në vend të kësaj, ajo po vazhdon të marrë kontrata publike.