Preshevë, Bujanoc, Medvegjë – Kryetari i Trupit Koordinues të Qeverisë së Serbisë për komunat Preshevë, Bujanoc dhe Medvegjë, Dr. Aleksandar Martinoviq, së bashku me ushtruesin e detyrës së drejtorit të Shërbimit të këtij trupi, Nenad Mitroviq, kanë reaguar ashpër ndaj deklaratave të ministrit të Punëve të Brendshme të institucioneve të përkohshme në Prishtinë, Xhelal Sveçla, i cili në rrjete sociale ka akuzuar Serbinë për shkelje të të drejtave të njeriut dhe spastrim etnik në jug të vendit. https://www.facebook.com/share/p/18kCfY3rK5/?mibextid=wwXIfr

Në deklaratën e tyre zyrtare, përfaqësuesit e Trupit Koordinues i hedhin poshtë këto akuza si “të pabazuara, të papranueshme dhe jashtëzakonisht të rrezikshme”, duke theksuar se Republika e Serbisë është e përkushtuar ndaj integrimit të të gjitha komuniteteve, respektimit të të drejtave të njeriut dhe sigurimit të barazisë për të gjithë qytetarët, pavarësisht përkatësisë etnike.

Sipas tyre, strukturat policore në Preshevë, Bujanoc dhe Medvegjë janë multietnike dhe përfshijnë pjesëtarë të barabartë nga komuniteti serb, shqiptar dhe rom. Megjithë përpjekjet për përfshirje, interesimi nga ana e komunitetit shqiptar për të marrë pjesë në konkursin për pranimin e policëve ka qenë shumë i ulët.

Deklarata gjithashtu thekson se, ndryshe nga situata e tensionuar dhe e dhunshme në Kosovë, në këto komuna respektohen të drejtat e njeriut dhe nuk ka raste të dhunës apo diskriminimit ndaj shqiptarëve. Institucionet funksionojnë normalisht dhe të gjithë qytetarët gëzojnë liri të plotë.

Përfaqësuesit serbë paralajmërojnë se deklarata të tilla të papërgjegjshme nga Prishtina rrezikojnë paqen dhe bashkëjetesën ndëretnike në rajon dhe përbëjnë përpjekje për të shmangur vëmendjen nga problemet e brendshme të Kosovës, përfshirë kaosin institucional dhe mungesën e funksionalitetit të institucioneve atje.

Republika e Serbisë, përfundon deklarata, do të vazhdojë të mbrojë sundimin e ligjit, të drejtat e qytetarëve dhe do të kundërshtojë çdo formë diskriminimi apo keqinformimi.