Shqipëria Civile ka bërë sot një thirrje të fortë publike drejtuar qytetarëve dhe institucioneve vendore, duke hapur një peticion për emërtimin urgjent të rrugëve, me qëllim t’i jepet fund një situate që prej vitesh rëndon mbi qytetarët – veçanërisht mbi të moshuarit e zonave rurale.

Organizata thekson se aktualisht qindra qytetarë, sidomos të moshuar që mezi ecin apo flasin, detyrohen të presin nëpër shtëpi derisa policia t’u verifikojë adresën për të marrë një dokument identifikimi. Shumë prej tyre, ndonëse kanë jetuar gjithë jetën në të njëjtin vend, sot duhet të “dëshmojnë” se ku banojnë, vetëm sepse rrugët nuk kanë emër ose shtëpitë nuk kanë numër.

“Kjo nuk është thjesht çështje administrative – është padrejtësi, është dhimbje, është përulje e panevojshme”, thuhet në njoftimin e organizatës. Sipas tyre, vonesat e institucioneve për sistemimin e adresave e kanë lënë situatën të degradojë, duke krijuar frikë dhe pasiguri te qytetarët, sidomos te të moshuarit që shpesh hezitojnë edhe të dalin nga shtëpia.

Shqipëria Civile paralajmëron se institucionet mund të emërtojnë rrugët pa konsultim me banorët, duke rrezikuar një valë të re verifikimesh dhe burokracish, e cila do të rëndonte sërish mbi qytetarët e thjeshtë.

Për këtë arsye, organizata ka nisur një peticion qytetar, i cili kërkon vetëm 100 nënshkrime për t’i detyruar Pushtetin Vendor dhe Kuvendin Komunal të marrin vendim për emërtimin e rrugëve me pjesëmarrjen e vetë banorëve.

Thirrje për qytetarët pa emër rruge

Organizata u bën apel banorëve të zonave pa adresë të kontribuojnë me propozimet e tyre për emërtimin e rrugëve, duke theksuar se askush nuk e njeh më mirë lagjen sesa vetë komuniteti.

Pse ky peticion?

Sepse qytetarët meritojnë dinjitet. Sepse njeriu duhet të jetojë pa frikë në shtëpinë e vet. Sepse është koha të mendojmë për ata që nuk flasin dot, për nënat dhe baballarët që presin pas dyerve të mbyllura, për fshatarët e moshuar që nuk kanë mundësi të ndjekin procedura të lodhshme.

Shqipëria Civile thekson se kjo nismë nuk është politike, por një thirrje për drejtësi dhe humanitet.

FIRMOS PETICIONIN

📅 05 dhjetor 2025

📍 Qendra e Qytetit

📝 Nevojiten vetëm 100 nënshkrime.

“Eja, bashkohu. Eja, të ngremë zërin për njëri-tjetrin.”

📞 Kontakt: 069 655 224