Ish-shefja e diplomacisë së Bashkimit Europian dhe aktualisht rektore e “Collegio d’Europa”, Federica Mogherini, është ndaluar në Bruksel në kuadër të një hetimi të Prokurorisë Europiane mbi dyshime për mashtrim dhe korrupsion të lidhura me një program trajnimi për diplomatët e rinj të BE-së.

Sipas mediave belge, së bashku me Mogherinin është ndaluar edhe Stefano Sannino, ish-sekretar i përgjithshëm i Shërbimit Europian të Veprimit të Jashtëm (SEAE) dhe aktualisht drejtues i DG Mediterraneo në Komisionin Europian. Një menaxher i “Collegio d’Europa”, identiteti i të cilit nuk është bërë publik, është personi i tretë i përfshirë në operacion.

Prokuroria Europiane ka kryer kontrolle në zyrat e SEAE-së në Bruksel dhe në ambiente të “Collegio d’Europa” në Bruges. Hetimi lidhet me dyshime për favorizim, konkurencë të pandershme dhe shpërndarje të paracaktuar të tenderëve gjatë periudhës 2021–2022, për një program 9-mujor të trajnimit të diplomatëve europianë.

Autoritetet po verifikojnë nëse përfaqësues të Kolegjit kanë pasur akses paraprak në kriteret e tenderit dhe nëse janë kryer shkelje që lidhen me korrupsion, konflikt interesi, shkelje të sekretit profesional dhe mashtrim me fondet e BE-së.

Prokuroria Europiane kishte kërkuar më herët heqjen e imunitetit të disa zyrtarëve, kërkesë që është miratuar pak para operacionit të sotëm. Ndërkohë, Komisioni Europian ka refuzuar të komentojë, duke theksuar se “hetimi është në proces”.