Përfaqësues nga Bujanoci zhvilluan dy takime të rëndësishme në Tiranë me zyrtarë të Qeverisë së Shqipërisë, duke kërkuar mbështetje për shqiptarët në Luginën e Preshevës.

Në takimin me Zëvendësministren e Ekonomisë, Kulturës dhe Inovacionit, Blerta Rama, u diskutua për lehtësimin e tregtisë mes Bujanocit dhe tregut shqiptar, mbështetjen e aktiviteteve kulturore dhe artistike si dhe bashkëpunimin në fushën e inovacionit për shkollat shqipe dhe qendrat rinore.

Ndërkaq, në bisedën me Zëvendësministren e Arsimit dhe Sportit, Orjana Osmani, u kërkuan vende shtesë për studentët shqiptarë të Luginës në universitetet shqiptare, bursa dhe akomodim. Po ashtu, u theksua nevoja për investime në shkollat shqipe të Bujanocit dhe ndikimi ndaj Beogradit për lehtësimin e përdorimit të teksteve mësimore në gjuhën shqipe.

Në fushën e sportit, u kërkua mbështetje për të rinjtë e talentuar në Bujanoc, duke përmendur si shembull kapitenin e kombëtares, Berat Gjimshitin, dhe mundësinë që këta sportistë të rinj, me kushtet e duhura, të përfaqësojnë një ditë ngjyrat kuqezi.

A1 Info