Pas vendosjes së sistemit EES, i cili që nga tetori i vitit të kaluar ka ndryshuar mënyrën e regjistrimit të udhëtarëve në kufijtë e Bashkimit Evropian, qytetarët e Serbisë pritet të përballen me një tjetër risi të rëndësishme – ETIAS, leja elektronike e udhëtimit për hyrje në zonën Shengen, raporton Blic, përcjell A1info.

Sipas informacioneve të publikuara, ETIAS pritet të hyjë në fuqi në fund të vitit 2026, ndërsa aplikimi për këtë leje do të kushtojë 20 euro. Edhe pse data e saktë e fillimit të zbatimit ende nuk është konfirmuar zyrtarisht, autoritetet evropiane theksojnë se pa një ETIAS të vlefshme nuk do të lejohet hyrja në BE, pavarësisht mënyrës së udhëtimit.

ETIAS do të jetë i detyrueshëm për shtetasit e vendeve që aktualisht nuk kanë nevojë për vizë për zonën Shengen, përfshirë edhe Serbinë. Kjo do të thotë se udhëtarët do të duhet të aplikojnë paraprakisht përmes sistemit elektronik përpara çdo udhëtimi drejt vendeve të BE-së.

Në rast të udhëtimit me autobus drejt një prej 30 vendeve evropiane që kërkojnë ETIAS, kontrolli i lejes do të bëhet nga autoritetet kufitare me mbërritjen në kufi. Pa këtë dokument, hyrja në territorin e Bashkimit Evropian do të refuzohet.

Nga Bashkimi Evropian sqarojnë se kompanitë e transportit, përfshirë ato të autobusëve, nuk do të jenë të detyruara menjëherë ta kontrollojnë ETIAS-in para nisjes, pasi do të kenë një afat prej tre vitesh për t’u përshtatur me rregullat e reja. Megjithatë, përgjegjësia mbetet te vetë udhëtarët.

Shembull praktik:

Një shtetase e Serbisë që udhëton me autobus nga Beogradi drejt Zagrebit për pushime do të duhet të ketë një ETIAS të vlefshme. Edhe nëse kompania e autobusit nuk e kontrollon këtë dokument para nisjes, policia kufitare kroate do ta verifikojë në kufi, së bashku me plotësimin e kushteve të tjera për hyrje në vend.

Autoritetet evropiane u bëjnë thirrje qytetarëve që të informohen me kohë dhe të aplikojnë për ETIAS për të shmangur problemet dhe kthimet nga kufiri sapo sistemi të hyjë në fuqi.