Prishtinë – Shtetet e Bashkuara po përgatisin një dokument që kërkon njohjen reciproke midis Kosovës dhe Serbisë, njoftoi analisti politik Dushan Janjiq në emisionin Balkan Talks në Euronews Albania.

Sipas Janjiq, dokumenti pritet të publikohet në mars ose prill 2026 dhe synon të vendosë presion mbi Beogradin për të njohur zyrtarisht shtetin e Kosovës. Ai theksoi se drafti është diskutuar me ekspertë amerikanë dhe politikanë, duke përfshirë edhe kongresmenë, dhe përputhet me angazhimin e Kongresit Amerikan për një marrëveshje njohjeje reciproke midis dy vendeve.

Në vitin 2023, Kosova dhe Serbia arritën dakordime për Marrëveshjen e Brukselit dhe Aneksin e Ohrit, por deri tani ato nuk janë zbatuar. Dialogu politik gjatë vitit 2025 ka ngecur për shkak të zhvillimeve të brendshme politike dhe mungesës së angazhimit më të fuqishëm nga Bashkimi Evropian, si dhe trazirave në Serbi dhe mungesës së formimit të institucioneve në Kosovë.

Ekspertët e rajonit thonë se dokumenti amerikan mund të jetë një hap i rëndësishëm drejt normalizimit të marrëdhënieve dhe zbatimit të marrëveshjeve të mëparshme, duke i dhënë një dimension më të fuqishëm politik dhe diplomatik dialogut Kosovë‑Serbi.