Washington, 3 Prill 2025 – Qeveria amerikane ka ndaluar personelin e saj në Kinë, përfshirë anëtarët e familjes dhe kontraktorët me leje sigurie, nga çdo marrëdhënie romantike ose seksuale me qytetarët kinezë. Vendimi është marrë për arsye sigurie, mes shqetësimeve se agjentët e Pekinit mund të përdorin këto lidhje për të siguruar informacione sekrete.

Lajmi është publikuar nga Associated Press, duke cituar katër burime anonime me njohuri për çështjen. Megjithëse disa agjenci amerikane kishin më herët rregulla të ngjashme, një ndalim i tillë i përgjithshëm nuk ishte zbatuar publikisht që nga Lufta e Ftohtë.

Një version më i kufizuar i politikës ishte miratuar verën e kaluar, duke ndaluar marrëdhëniet mes personelit amerikan dhe qytetarëve kinezë që punonin në Ambasadën e SHBA-së dhe konsullatat në Kinë. Por në janar 2025, ambasadori amerikan në largim, Nicholas Burns, e shtriu ndalimin në të gjithë qytetarët kinezë, vetëm pak ditë përpara se Donald Trump të merrte detyrën si president i SHBA-së.

Ky vendim mund të ndikojë më tej në marrëdhëniet tashmë të tensionuara mes Uashingtonit dhe Pekinit, veçanërisht në fushën e diplomacisë dhe inteligjencës.

Burimi: Associated Press | Përgatiti: A2 CNN | Përcjell: A1 Info