Shtetet e Bashkuara kanë konfirmuar se po zhvillojnë bisedime të drejtpërdrejta me përfaqësues të Hamasit në Katar, duke shënuar një ndryshim të rëndësishëm nga politika e gjatë amerikane për të mos u angazhuar drejtpërdrejt me këtë grup, të cilin Departamenti i Shtetit e ka shpallur organizatë të huaj terroriste që nga viti 1997.

Sekretarja për shtyp e Shtëpisë së Bardhë, Karoline Leavitt, deklaroi të mërkurën se këto diskutime janë pjesë e përpjekjeve për të mbrojtur interesat e qytetarëve amerikanë, veçanërisht për lirimin e pengjeve të mbajtura nga Hamasi në Gaza.

“Dialogu dhe bisedimi me njerëz përreth botës për të bërë atë që është në interesin më të mirë të popullit amerikan është diçka që presidenti beson se është një përpjekje e drejtë,” tha Leavitt.

Ajo shtoi se Izraeli është konsultuar lidhur me këtë angazhim të drejtpërdrejtë, duke nënvizuar se “janë jetë të amerikanëve në rrezik.”

Bisedimet po zhvillohen në Katar, me ndërmjetësimin e zyrtarëve nga Egjipti dhe Katari, të cilët kanë luajtur rol kyç në lehtësimin e negociatave mes Izraelit dhe Hamasit që prej sulmit të 7 tetorit 2023.

Zyra e kryeministrit izraelit, Benjamin Netanyahu, ka konfirmuar se Izraeli i ka përcjellë SHBA-së qëndrimin e tij lidhur me këto bisedime direkte.

Armëpushimi në Gaza vazhdon, ndërsa komuniteti ndërkombëtar vëzhgon nga afër këtë zhvillim të paprecedentë, duke shpresuar për hapa drejt stabilitetit dhe zgjidhjes së krizës humanitare në rajon.

A1 Info do të vazhdojë të sjellë detaje të reja mbi këtë temë.