Policia e Trafikut në Serbi po hyn në një fazë të re të digjitalizimit. Brenda disa javësh, çdo polic që kryen kontrolle në komunikacion pritet të pajiset me një pajisje të posaçme Android, përmes së cilës do të ketë qasje në kohë reale në të dhënat për kundërvajtjet rrugore.

Këtë e ka bërë të ditur shefi i Drejtorisë së Policisë së Trafikut, Slaviša Lakićević, duke sqaruar se pajisjet do t’u mundësojnë policëve të shohin të dhënat për kundërvajtjen, automjetin, vendin dhe kohën kur është kryer shkelja, si dhe informacionet e nevojshme për shqiptimin e gjobës.

Aktualisht, 480 pajisje janë në përdorim në pesë drejtori policore në Serbi, ndërsa faza e testimit tashmë ka përfunduar. Në vijim është implementimi i sistemit dhe trajnimi i policëve, pas së cilës pritet që pajisjet të përdoren në të gjithë territorin e Serbisë.

Sistemi do të përfshijë edhe kundërvajtjet e regjistruara nga kamerat automatike. Kjo nënkupton se policët do të mund të marrin në kohë reale informacione për shkeljet e evidentuara nga kamerat, përfshirë tejkalimin e shpejtësisë dhe kundërvajtje të tjera.

Më e vështirë shmangia e gjobave edhe për të huajt

Sistemi i ri do të ketë rëndësi të veçantë edhe për shtetasit e huaj që kryejnë kundërvajtje gjatë qëndrimit apo kalimit nëpër Serbi.

Sipas Lakićević, kur një drejtues i huaj të paraqitet në një pikë kufitare, policia do të mund të ketë informacion për kundërvajtjet e regjistruara më herët, përfshirë tejkalimin e shpejtësisë mesatare në autostrada.

Në fletën e printuar të kundërvajtjes do të gjendet edhe një kod QR. Në rastet kur gjoba është në shumë fikse, kundërvajtësi do të mund ta paguajë atë menjëherë, pa qenë e nevojshme të paraqitet para gjyqtarit për kundërvajtje.

Digjitalizimi i punës së Policisë së Trafikut është cilësuar si një nga prioritetet e Ministrisë së Punëve të Brendshme të Serbisë.

Burimi: Tanjug/A1info