Kryetari i Lëvizjes për Reforma në Preshevë, Sami Salihu, ka reaguar me tone ironike ndaj vizitës së fundit të Kryetares së Komunës së Preshevës, Ardita Sinani, në Bashkinë e Elbasanit. Ai e ka quajtur këtë vizitë si një tjetër shembull të asaj që e cilëson si “djalinxhizëm politik”, duke kritikuar pushtetin aktual për mungesë të rezultateve konkrete dhe fokus vetëm në imazh.

Në një reagim të publikuar në rrjete sociale, Salihu u shpreh:

“Qytetarë të Komunës së Preshevës,

Urime! Fishekzjarrët, ju lutem!

Kryetarja Ardita Sinani sërish në vizitë. Me delegacion. Me buzëqeshje. Me kostume të hekurosura. Si për Elbasanin e bukur të këngës.”

Duke ironizuar fjalorin institucional, ai vijon:

“Dhe natyrisht:

‘Takime të ngrohta’.

‘Hapa konkretë’.

‘Thellim bashkëpunimi’.

‘Projekte konkrete’.

‘Zhvillim rajonal’.

‘Integrim ndërkufitar’.

Agroturizëm?! Për investime dhe punësim.

Gjithçka thuhet. Gjithçka fotografohet.

Foto, foto, foto, foto…”

Salihu i drejtohet qytetarëve duke i lënë të kuptojnë se pas gjithë këtyre paraqitjeve publike e vizitave zyrtare, rezultatet reale për qytetarët mungojnë.

Ai përmbyll reagimin me një mesazh sarkastik:

“Dhe në fund? Rezultatin… e dini ju.”

Kjo deklaratë vjen si pjesë e kritikave të vazhdueshme të opozitës ndaj qeverisjes lokale në Preshevë, veçanërisht për atë që ata e konsiderojnë politikë të imazhit dhe mungesë të veprimit konkret në terren.

A1info