Presidenti rus, Vladimir Putin, ka nënshkruar një dekret për thirrjen e 160,000 qytetarëve për shërbim ushtarak, raporton agjencia e lajmeve Interfax dhe Euronews Albania. Dekreti, i publikuar në faqen zyrtare të qeverisë ruse për shpalljet ligjore, përcakton se rekrutimi do të prekë qytetarët nga 18 deri në 30 vjeç, duke zgjatur nga prilli deri në korrik të këtij viti.

Në dekret thuhet gjithashtu se “ushtarët, marinarët, sergjentët dhe oficerët që kanë përfunduar shërbimin e detyrueshëm ushtarak” do të shpallen të liruar nga detyra dhe do të largohen nga ushtria.

Tradicionalisht, ushtria ruse rekruton dy herë në vit, një herë në pranverë dhe një herë në vjeshtë. Rekrutimi i fundit, zhvilluar nga tetori deri në dhjetor të vitit të kaluar, solli 133,000 ushtarë të rinj për një vit shërbimi ushtarak.

Në janar të vitit të kaluar, Putin miratoi një ligj që ngriti moshën maksimale për rekrutim nga 27 në 30 vjeç, duke rritur numrin e qytetarëve të kualifikuar për shërbim ushtarak.

Megjithatë, rritja e kapacitetit ushtarak nuk ka parandaluar humbjet e mëdha të ushtrisë ruse në Ukrainë. Sipas një vlerësimi të fundit nga Mbretëria e Bashkuar, më shumë se 768,000 ushtarë rusë janë vrarë, plagosur, zhdukur ose kapur peng në konfliktin e përgjakshëm që nga fillimi i pushtimit në vitin 2022.

Në nëntor dhe dhjetor të vitit të kaluar, Rusia përjetoi humbjet më të mëdha, me deri në 2,030 ushtarë të vrarë në një ditë, shifra më e lartë mujore që nga fillimi i luftës.

Në fillim të dhjetorit, Presidenti ukrainas Volodymyr Zelenskyy deklaroi se Ukraina kishte humbur 43,000 ushtarë në fushën e betejës.

Ky mobilizim i fundit vjen ndërkohë që lufta në Ukrainë vazhdon të shkaktojë viktima dhe përkeqësim të situatës për të dyja palët.

/Euronews Albania/