LONDËR — Ka përfunduar samiti i rëndësishëm i organizuar nga kryeministri britanik, Keir Starmer, me fokus Ukrainën dhe sigurinë e Evropës. Takimi, i cili zgjati rreth dy orë, mblodhi disa nga liderët kryesorë evropianë dhe kryeministrin e Kanadasë, duke diskutuar çështjet urgjente të stabilitetit dhe mbështetjes ndaj Ukrainës.

Sipas raportimeve të BBC, pritet që kryeministri Starmer të mbajë së shpejti një konferencë për media, ku do të zbulojë më shumë detaje rreth bisedimeve dhe masave të mundshme që do të ndërmerren për të forcuar sigurinë e kontinentit dhe për të mbështetur Ukrainën në luftën e saj kundër agresionit rus.

Ky samit vjen në një moment kritik për Evropën, ndërsa tensionet në lindje vazhdojnë të rriten dhe nevoja për unitet dhe veprim të përbashkët bëhet gjithnjë e më urgjente.

(Artikulli do të përditësohet pas deklaratës së kryeministrit Starmer.)