Nga Arben Mehmeti

Është shqetësuese dhe alarmante që në Luginën e Preshevës gjithnjë e më shumë fëmijë, duke filluar nga mosha 13-vjeçare, po përdorin cigare elektronike (vape). Ky fenomen po bëhet çdo ditë e më i dukshëm në stadiume, në kafeteri dhe në vende të tjera publike, ku shpesh shihen edhe të rinj që konsumojnë pije alkoolike. Kjo nuk është më vetëm një çështje familjare, por një problem serioz shoqëror që kërkon reagim të menjëhershëm.

Pyetja që shtrohet është: Kush është përgjegjës? Prindërit, shitësit apo institucionet komunale?
Prindërit kanë përgjegjësinë e parë për edukimin dhe mbikëqyrjen e fëmijëve të tyre. Megjithatë, nuk mund t’u hidhet e gjithë barra vetëm atyre. Kur një i mitur mund të blejë lehtësisht cigare elektronike apo produkte të tjera të ndaluara për moshën e tij, atëherë kemi edhe dështim të institucioneve përgjegjëse.

Institucionet komunale, inspektoratet dhe organet kompetente duhet të ushtrojnë kontrolle të rregullta ndaj bizneseve që i shesin këto produkte të miturve. Nëse ligji ekziston, ai duhet të zbatohet. Nëse nuk zbatohet, atëherë përgjegjësia bie mbi ata që kanë detyrë ta mbrojnë interesin publik.

Edhe pronarët e kafeterive dhe të dyqaneve duhet të tregojnë përgjegjësi. Fitimi nuk mund të jetë më i rëndësishëm se shëndeti i fëmijëve tanë. Shitja e cigareve elektronike dhe e produkteve të tjera të kufizuara për të miturit nuk duhet të tolerohet.
Fëmijët janë e ardhmja e Luginës së Preshevës. Nëse sot i lëmë pa mbrojtje, nesër do të përballemi me pasoja shumë më të rënda për shëndetin dhe mirëqenien e tyre. Prandaj kërkohet angazhim i përbashkët i prindërve, shkollave, institucioneve komunale, policisë dhe gjithë shoqërisë.

Heshtja nuk është zgjidhje. Është koha që secili të marrë përgjegjësinë që i takon dhe të veprojë për ta mbrojtur rininë tonë nga një fenomen që po përhapet me shpejtësi.
Shkruar nga Arben S Mehmeti @Highlight