Prishtinë – Anëtari i Kryesisë së Nismës Socialdemokrate, Vesel Krasniqi, ka mohuar kategorikisht raportimet e fundit që sugjeronin se tre deputetët e Nismës do të mbështesin formimin e Qeverisë Kurti pa u përfshirë në koalicionin qeverisës.

Në një deklaratë për “KosovaPress”, Krasniqi i cilësoi këto informacione si “spekulime”, duke sqaruar se aktualisht nuk ka asnjë lëvizje nga ana e partisë dhe se Nisma mbetet e përkushtuar ndaj qëndrimeve të mëhershme të kryetarit Fatmir Limaj.

Limaj, pas zgjedhjeve të 9 shkurtit, kishte refuzuar të vendoste “vija të kuqe” për Lëvizjen Vetëvendosje (LVV), duke shprehur gatishmërinë për diskutime mbi çështje të rëndësishme kombëtare. Megjithatë, Nisma Socialdemokrate ka zhvilluar takime edhe me liderët e partive opozitare, përfshirë PDK-në, LDK-në dhe AAK-në, për mundësinë e formimit të një qeverie alternative.

“Këto janë spekulime. Ne jemi në deklarimet e zotëri Limajt dhe nuk kemi asnjë lëvizje për momentin,” theksoi Krasniqi.

Nisma Socialdemokrate do të ketë tre deputetë në Kuvendin e Kosovës, pasi garoi në zgjedhjet e 9 shkurtit në koalicion parazgjedhor me Aleancën për Ardhmërinë e Kosovës (AAK).

Sipas rezultateve të certifikuara nga Komisioni Qendror i Zgjedhjeve më 27 mars, LVV-ja ka fituar 48 ulëse në Kuvend, PDK-ja ka 24 ulëse, LDK-ja 20, ndërsa koalicioni AAK-Nisma ka siguruar 8 ulëse.

Kjo situatë politike mbetet e paqartë, ndërsa pritet që subjektet politike të vazhdojnë negociatat për formimin e qeverisë së re në Kosovë.