Sipas informatave të publikuara nga KOHA, Lëvizja Vetëvendosje (LVV) dhe Lidhja Demokratike e Kosovës (LDK) kanë arritur një marrëveshje në parim për formimin e institucioneve të reja të Kosovës. Megjithatë, asnjëra nga dy partitë nuk e ka konfirmuar zyrtarisht këtë dakordim.  

Sipas burimeve:

• LDK do të bëhet pjesë e koalicionit qeverisës.
• Do të marrë postin e zëvendëskryeministrit të parë dhe tri ministri.
• Po ashtu, LDK pritet të drejtojë Kuvendin duke marrë postin e kryetarit të Kuvendit.
• Emrin për president do ta propozojë Vetëvendosje.  

Megjithatë, marrëveshja ende nuk është formalizuar për shkak të zhvillimeve të brendshme në LDK. Sipas raportimeve, një grup deputetësh ka nisur procedurat për shkarkimin e kryetarit të partisë, Lumir Abdixhiku, çka ka krijuar paqartësi mbi vazhdimin e negociatave. Vetë Abdixhiku ka njoftuar se ka ndërprerë angazhimin në bisedimet për formimin e institucioneve deri në sqarimin e situatës së brendshme në parti.