Nga Arben Mehmeti

Në një kohë kur informacioni është një nga shtyllat kryesore të demokracisë, qytetarët e Luginës së Preshevës po përballen me një varfëri të dukshme të debatit publik dhe të informimit profesional. Mediat lokale, të cilat do të duhej të ishin zëri i qytetarëve dhe pasqyra e problemeve të përditshme, fatkeqësisht kanë mbetur larg rolit që u takon.

Televizionet lokale si RTV Aldi dhe RTV Presheva rrallëherë organizojnë debate televizive për temat që preokupojnë qytetarët. Mungojnë emisionet analitike, ballafaqimet politike, diskutimet për ekonominë, arsimin, të rinjtë, diasporën dhe sfidat e shumta me të cilat përballet Lugina e Preshevës.

Kur mungon debati publik, mungon edhe llogaridhënia. Kur nuk ka pyetje, nuk ka as përgjigje. Dhe kur mediat heshtin, humb qytetari.

Në këtë boshllëk mediatik, një rol të veçantë po luan SYRI TV nga Zvicra. Përmes emisionit “Diaspora e Luginës”, kjo media ka arritur të krijojë një urë komunikimi ndërmjet diasporës dhe vendlindjes. Emisioni po trajton tema që prekin drejtpërdrejt interesat e shqiptarëve të Luginës dhe po u jep hapësirë personaliteteve, analistëve, aktivistëve dhe qytetarëve të shprehin mendimet e tyre.

Nuk është rastësi që “Diaspora e Luginës” po fiton shikueshmëri të madhe si në diasporë ashtu edhe në Preshevë, Bujanoc e Medvegjë. Qytetarët po kërkojnë informacion, debat dhe transparencë – pikërisht ato që shpesh mungojnë në mediat lokale.

Kjo nuk duhet të shihet si sulm ndaj mediave lokale, por si një thirrje për reflektim. Lugina e Preshevës meriton media më aktive, më të guximshme dhe më afër qytetarëve. Meritohen debate të hapura, pyetje kritike dhe emisione që trajtojnë problemet reale të njerëzve.

Nëse një televizion nga diaspora po arrin të mbulojë temat e Luginës më shumë se mediat që veprojnë në vetë Luginën, atëherë është koha të shtrohet pyetja: ku është problemi?

Qytetarët nuk kanë nevojë vetëm për lajme të përditshme. Ata kanë nevojë për debat, analizë, transparencë dhe një media që mbron interesin publik.

Lugina e Preshevës meriton më shumë. Dhe media ka përgjegjësinë kryesore për ta bërë këtë realitet.

Arben Mehmeti
Moderator i emisionit “Diaspora e Luginës”

Shënim: Pikëpamjet dhe qëndrimet e shprehura në këtë opinion janë ekskluzivisht të autorit dhe nuk përfaqësojnë domosdoshmërisht qëndrimet e redaksisë. Redaksia nuk mban përgjegjësi për përmbajtjen e këtij shkrimi.