Pas Lituanisë, edhe Letonia ka ndaluar fluturimin e një aeroplani serb që transportonte presidentin Aleksandar Vuçiq drejt Moskës. Autoritetet letoneze justifikuan vendimin me “ndjeshmërinë politike të qëllimit të fluturimit”, duke iu bashkuar një serie kufizimesh ajrore nga vendet baltike.

Më herët, edhe Lituania kishte refuzuar lejen e fluturimit për të njëjtin avion, duke u thirrur në “ndjeshmëri teknike dhe diplomatike”, raportoi Telegrafi. Veprime të ngjashme janë marrë edhe ndaj kryeministrit sllovak Robert Fico, të cilit iu ndalua të kalonte mbi hapësirën ajrore të Polonisë dhe Lituanisë, në përpjekje për ta penguar pjesëmarrjen në aktivitetet përkujtimore të 80-vjetorit të fitores ndaj nazizmit.

Sipas ndihmësit të presidentit rus, Yuri Ushakov, Aleksandar Vuçiq pritet të takohet me presidentin rus Vladimir Putin më 9 maj në kuadër të një takimi dypalësh. Këto lëvizje diplomatike po ndodhin në një kontekst të ndjeshëm gjeopolitik dhe janë shenjë e tensioneve të rritura midis Rusisë dhe vendeve të BE-së në lidhje me mbështetësit e saj në rajon.

Burim: Telegrafi.com, transmeton A1 info.