Kryetari i Lëvizjes për Reforma, Sami Salihu, ka bërë një deklaratë serioze dhe të matur lidhur me situatën aktuale politike të shqiptarëve në Luginën e Preshevës. Ai ka theksuar se ka shumë kohë që brenda politikës shqiptare në këtë rajon mungon konsensusi edhe më minimal, i nevojshëm për zhvillimin dhe avancimin e çështjeve të shqiptarëve në Serbi.

Salihu e ka cilësuar konsensusin si një proces që nuk mund të jetë “tavolinë suedeze”, ku çdo individ merr vetëm atë që i përshtatet, as dominim i shumicës mbi pakicën. Sipas tij, sa më pak moralizime rreth konsensusit, sidomos nga ata që e kanë shpërbërë dhe sabotuar këtë proces, aq më mirë.

Ai ka theksuar se mirëbesimi dhe dialogu janë parakushte të domosdoshme për arritjen e konsensusit, por aktualisht këto elemente mungojnë në Luginën e Preshevës. Ndërkohë, ai ka ftuar të gjitha subjektet politike shqiptare nga Presheva, Bujanoci dhe Medvegja që të përqendrohen në rifillimin e dialogut dhe ndërtimin e mirëbesimit.

Duke pranuar se aktualisht nuk ekzistojnë kapacitete dhe klima e favorshme për të arritur konsensusin, Salihu ka theksuar se Lëvizja për Reforma mirëpret kontributin e çdokujt, sidomos të Republikës së Kosovës dhe Republikës së Shqipërisë. Ai ka bërë të ditur se si kryetar i Lëvizjes për Reforma do t’i drejtohet Qeverisë së Republikës së Shqipërisë për të kërkuar ndihmë në organizimin e një takimi të përbashkët të spektrit politik shqiptar në Luginën e Preshevës, për të diskutuar rreth gjendjes politike dhe mundësive për ndërtimin e politikave konsensuale.

Salihu ka theksuar se këto konsultime duhet të zhvillohen edhe me institucionet e Qeverisë së re të Republikës së Kosovës, sapo ajo të legjitimohet dhe legalizohet. Ai ka përfunduar duke deklaruar se politika shqiptare në Luginën e Preshevës ka nevojë urgjente për një konsensus gjithëpërfshirës dhe funksional për të avancuar çështjet e shqiptarëve në rajon.