Kryetari i Këshillit Kombëtar Shqiptar ka shprehur indinjatën e tij përmes një postimi në Facebook lidhur me zvogëlimin e buxhetit të këtij institucioni nga organet qendrore. Sipas tij, Qeveria e Republikës së Serbisë ka ulur buxhetin për Këshillin Kombëtar Shqiptar edhe këtë vit, duke vazhduar një politikë diskriminuese ndaj shqiptarëve.

Vendimi për ndarjen e buxhetit për këshillat e pakicave kombëtare tregon, sipas kryetarit, një qasje të qëndrueshme diskriminuese ndaj shqiptarëve. Ashtu si në vitin 2024, edhe për këtë vit, me zvogëlimin e financimit të rregullt nga Ministria, Qeveria e Serbisë synon të vështirësojë funksionimin normal të institucionit të vetëm përfaqësues të shqiptarëve.

Sipas vendimit të Ministrisë, buxheti për këshillat e pakicave është zvogëluar me 166,163 dinarë krahasuar me vitin e kaluar, duke kaluar nga 306,152,327 dinarë në 305,986,164 dinarë. Nga kjo shumë e zvogëluar, 47% ose 78,223 dinarë i është hequr vetëm Këshillit Kombëtar Shqiptar, që do të thotë se gati gjysma e shkurtimit të buxhetit për këshillat e pakicave prek vetëm këtë këshill.

Ky veprim konsiderohet nga kryetari si një goditje ndaj Këshillit Kombëtar Shqiptar dhe një vazhdimësi e agjendës politike të shtetit serb ndaj shqiptarëve, e cila, sipas tij, është diskriminuese.