Faruk Begolli ishte një nga figurat më karizmatike dhe më të dashura të artit në ish-Jugosllavi. Aktor, skenarist dhe pedagog, ai u shndërrua në simbol të elegancës, talentit dhe sharmit mashkullor gjatë viteve ’70 dhe ’80. Publiku e adhuronte, ndërsa kinematografia dhe teatri e konsideronin një nga shtyllat kryesore të brezit të artë.

Në moshën vetëm 33-vjeçare, Faruku kishte realizuar 33 filma – një shifër që flet për intensitetin dhe madhështinë e karrierës së tij. Në total, ai luajti në rreth 70 filma artistikë dhe në dhjetëra shfaqje teatrore, duke bashkëpunuar me regjisorët më të mëdhenj të kohës. Në shumë qytete u krijuan klube adhuruesish vetëm për të, gjë e rrallë për një aktor të atyre viteve.

Por, përtej famës dhe suksesit, jeta e tij emocionale u shënua nga një dashuri e vetme dhe e thellë – ajo me balerinën e njohur Zoja Begoli. Martesa e tyre zgjati plot 17–18 vjet dhe, sipas vetë Farukut, ishte dashuria më e madhe e jetës së tij. Edhe pse martesa përfundoi me divorc, lidhja shpirtërore mes tyre mbeti e fortë. Zoja e mbajti mbiemrin e tij edhe pas ndarjes, një shenjë e qartë e respektit dhe dashurisë që kishin ndarë.

Faruk Begolli fliste rrallë për jetën private, por kur fliste për Zojën, fjalët e tij ishin gjithmonë të mbushura me mirënjohje dhe qetësi:

“Ka ekzistuar një dashuri e vërtetë dhe një martesë e vërtetë. Jam i pasur me atë dashuri dhe me atë grua.”

Ai theksonte se me të kishte njohur çfarë do të thotë një jetë e bukur, një partneritet i vërtetë dhe një miqësi që mbijetoi edhe pas ndarjes. Gjatë viteve të luftës, ata ruajtën kontaktin, duke u siguruar se të dy ishin mirë – një detaj që flet për lidhjen e thellë njerëzore mes tyre.

Faruk Begolli ndërroi jetë në Prishtinë në vitin 2007, në moshën 63-vjeçare, duke lënë pas një trashëgimi të jashtëzakonshme artistike dhe një imazh të paharrueshëm: një shmekër i vërtetë, një artist i madh dhe një njeri që deshi vetëm një herë – por me gjithë qenien e tij.

Kush ishte Zoja Begolli (1949–2017) ishte balerinë dhe pedagoge e shquar nga Beogradi. Ajo përfundoi Shkollën e Baletit “Lujo Daviço” dhe më pas specializoi dy vjet në Akademinë prestigjioze “A. J. Vaganova” në Leningrad. Pjesë e Baletit të Teatrit Popullor në Beograd, interpretoi role kryesore në balete klasike dhe moderne si Kopelija, Zhisela, Don Kishoti, dhe Ana Karenina. Puna e saj pedagogjike u zhvillua në Shkollën e Baletit “Lujo Daviço” dhe Akademinë BK, ku edukoi breza të rinj valltarësh.

Në jetën private, ishte nënë e dy fëmijëve dhe bashkëshortja e aktorit Faruk Begolli për disa vite. Zoja Begolli ndërroi jetë në moshën 68-vjeçare, duke lënë pas një trashëgimi të çmuar artistike dhe kulturore.