Bujanoc, 25 maj 2025 Sot, në Shtëpinë e Kulturës në Bujanoc u mbajt një nga ngjarjet më të ndjera dhe më të fuqishme përkujtimore në nder të Komandant Lleshit një figurë emblemë e qëndresës dhe sakrificës kombëtare.

Tubimi përkujtimor, i organizuar nën patronatin e Komunës së Bujanocit, solli emocione të thella dhe përjetime të fuqishme, duke dëshmuar se kujtesa kolektive për heronjtë tanë është e gjallë, krenare dhe frymëzuese.

Në këtë ngjarje, mbajti fjalë rasti edhe kryetari i Komunës së Bujanocit, Arbër Pajaziti, i cili theksoi rëndësinë e përjetësimit të figurave kombëtare dhe nevojën për unitet rreth vlerave të përbashkëta.

Drejtori artistik Shkodran Tolaj solli një program të jashtëzakonshëm, që preku çdo pjesëmarrës me ndjeshmërinë dhe nivelin e lartë artistik. Interpretimet e artistëve më të mirë shqiptarë u shndërruan në një homazh të denjë për jetën dhe veprën e Komandant Lleshit.

Shtëpia e Kulturës ishte e tejmbushur me qytetarë, të cilët me pjesëmarrjen e tyre treguan se historia nuk harrohet, dhe se ata që sakrifikuan për liri jetojnë në kujtesën tonë të përbashkët.

“Komandant Lleshi meriton më shumë se kaq – por kjo është më e pakta që mund të bëjmë për të nderuar idealin dhe jetën e tij,” u tha gjatë eventit.

Bujanoci vazhdon të jetë qendër e historisë, kulturës dhe trashëgimisë gjithëkombëtare, një vend ku kujtimi për heronjtë tanë nuk shuhet kurrë, por përkundrazi, rritet me brezat që vijnë.

A1info.