Bujanoc, Një incident i rëndë ka ndodhur në Bujanoc, ku ndihmësi i kryetarit të komunës, Stefan Arsiç, dhe babai i tij, Sasha Arsiç, janë arrestuar nën dyshimin për sulm fizik ndaj një polici në pension.

Sipas burimeve nga organet hetimore, ngjarja ka ndodhur disa ditë më parë, ndërsa arrestimi i të dyshuarve u realizua dje, pas një periudhe gjatë së cilës ata dyshohet se ishin në arrati. Polici në pension, i cili pësoi lëndime të rënda, është transportuar me urgjencë në Qendrën Klinike të Nishit për trajtim mjekësor.

Pas marrjes në pyetje, Gjykata Themelore në Bujanoc ka vendosur masën e paraburgimit prej 30 ditësh për të dy personat, deri në përfundimin e hetimeve.

Autoritetet po vijojnë hetimet për të zbardhur rrethanat e plota të ngjarjes dhe motivet që çuan në sulmin ndaj ish-policit. Ky incident ka shkaktuar reagime të shumta në opinionin lokal, sidomos për shkak të pozicionit publik që mban njëri nga të arrestuarit.