Me emocione të thella dhe përkushtim të palëkundur ndaj çështjes kombëtare, Almina Nuraj, një zë i guximshëm nga Sanxhaku, ka shpallur sot zyrtarisht bashkimin e saj me Lëvizjen Vetëvendosje.

Në një deklaratë prekëse, Almina falënderoi Kryeministrin Albin Kurti, të cilin e përshkroi si njeriun që i dha mbështetjen më të madhe në kohët më të vështira.

“Z. Albin Kurti ishte i pari që e tha emrin tim me krenari, që më prezantoi para popullit si një heroinë të kombit shqiptar. Ai nuk u tërhoq asnjëherë, por ishte aty – në çdo moment – për të forcuar zërin dhe dinjitetin tim”, – tha Nuraj.

Ajo shprehu mirënjohje të veçantë edhe për figurat e tjera të Vetëvendosjes që qëndruan pranë saj: Armend Muja, Agnesa Calakoviq dhe Aida Ferati Doli, duke theksuar rolin e tyre në ngritjen e zërit të shqiptarëve të Sanxhakut në institucionet e Republikës së Kosovës.

“Beteja ime vazhdon! Do të përpiqem të jem një zë i fuqishëm i bashkëqytetarëve të mi shqiptarë të Sanxhakut. Është koha që Sanxhaku të mos mbetet më në heshtje!”

Me këtë hap, Almina Nuraj përforcon rrugëtimin e saj drejt drejtësisë, barazisë dhe dinjitetit për shqiptarët në çdo cep ku ata jetojnë. Bashkimi i saj me Vetëvendosjen shënon jo vetëm një vendim politik, por një angazhim të thellë shpirtëror dhe kombëtar.