Afrim Abdullahu, punëtor i administratës komunale dhe kryetar i Bashkësisë Lokale në Tërrnavë, ka ngritur një shqetësim publik për presionin që po ushtrohet ndaj tij nga pushteti lokal në Preshevë. Ai pretendon se është kërcënuar me ndëshkim financiar ose ndërrim të vendit të punës vetëm pse ka ndihmuar bujqit të aplikojnë për stimujt e Ministrisë së Bujqësisë dhe të përmirësojnë ekonomitë e tyre bujqësore.

Abdullahu thekson se ndihma ka qenë plotësisht vullnetare dhe pa përfitim financiar. “Asnjëherë nuk kam kërkuar kompensim për ndihmën që u kam dhënë bujqve. E kam bërë vetëm për t’i ndihmuar, pasi shumë prej tyre nuk kanë njohuri për procedurat online,” deklaroi ai.

Megjithëse i punësuar në sektorin e Arkivit dhe pa përgjegjësi direkte në fushën e bujqësisë, Abdullahu ndjehej i obliguar të ndihmonte bujqit që përballeshin me vështirësi në aplikim, pasi procedurat kaluan online.

Deklarata e tij ka ngritur shqetësime mbi qasjen e pushtetit lokal ndaj bujqve dhe mbështetjes së tyre institucionale. Qytetarët e Preshevës presin një reagim nga autoritetet për të adresuar këto pretendime dhe për të garantuar mbështetje reale për sektorin bujqësor, pa pengesa burokratike apo ndërhyrje politike.