Presidentja e Republikës së Kosovës, Vjosa Osmani, ka ndarë Medaljen Presidenciale të Meritave (post mortem) për profesoreshën e ndjerë Sadete Presheva, në shenjë vlerësimi për kontributin e saj të jashtëzakonshëm në fushën e arsimit dhe edukimit në Preshevë.

Në ceremoninë e organizuar me këtë rast, u theksua roli i rëndësishëm që profesoresha Presheva ka pasur në formimin e brezave të tërë, duke u dalluar për përkushtimin e saj jetësor ndaj dijes, edukimit dhe kultivimit të vlerave tek nxënësit.

Ky vlerësim i lartë shtetëror vjen si një mirënjohje e merituar për punën dhe ndikimin e saj afatgjatë në komunitet. Trashëgimia e saj vazhdon të jetojë përmes gjurmëve që ka lënë tek nxënësit dhe kolegët, si dhe në kontributin e saj të çmuar në shoqëri.

Të pranishëm në këtë ceremoni ishin edhe familjarë të profesoreshës, të cilët e pranuan medaljen me krenari dhe emocion, duke rikujtuar figurën dhe veprën e saj si një shembull frymëzimi për brezat e ardhshëm.