Lëvizja VETËVENDOSJE! ka zyrtarizuar kandidaturën e Glauk Konjufca për President të Kosovës, pas dështimit për të arritur një marrëveshje me partitë opozitare.

Zgjedhjet e 28 dhjetorit 2025, të cilat u mbajtën pas një bllokade dhjetëmujore institucionale, prodhuan – sipas VV-së – rezultatin më të qartë në historinë e pasluftës në vend. Partia thekson se qytetarët votuan kundër bllokimit të shtetit dhe në favor të themelimit të institucioneve të reja.

Sipas njoftimit, Kuvendi dhe Qeveria janë konstituuar pa vonesë, ndërsa procesi i radhës është zgjedhja e Presidentit, për të cilën kërkohet pjesëmarrja e të paktën 80 deputetëve në sallë.

VV-ja njofton se ka ftuar disa herë subjektet më të mëdha opozitare për të propozuar emra konsensualë për postin e Presidentit, por pretendon se nuk ka marrë asnjë propozim konkret dhe se janë refuzuar edhe ofertat e saj.

Në këto rrethana, partia ka vendosur të propozojë ministrin e Punëve të Jashtme dhe Diasporës, ish-kryetarin e Kuvendit dhe deputetin e shtatë legjislaturave, Glauk Konjufcën, si kandidat për President.

Njëkohësisht, VV-ja ka ripërsëritur ftesën ndaj opozitës për të propozuar kandidat, duke ofruar edhe mbështetje me nënshkrime nga grupi parlamentar i saj, nëse është e nevojshme.

Sipas partisë, zgjedhjet e reja janë të panevojshme dhe ekziston mundësia për të arritur pajtueshmëri politike për zgjedhjen e Presidentit.