Për vetëm 18 ditë nga fillimi i aplikimeve më 8 dhjetor, qytetarët e Serbisë kanë paraqitur mbi 420.000 aplikime në kuadër të procesit “Svoj na svome” (I yti në tokën tënde), njoftoi Drejtoria Republikane e Gjeodezisë.

Aplikimet paraqiten në mënyrë të thjeshtë, të shpejtë dhe plotësisht falas – online nga shtëpia 24 orë në ditë, përmes Postës së Serbisë ose në njësitë e vetëqeverisjes lokale, me mbështetje të drejtpërdrejtë për qytetarët. Aktualisht, mbi 4.500 persona ofrojnë ndihmë në rreth 700 lokacione në të gjithë vendin.

Struktura e aplikimeve tregon se procesi “Svoj na svome” (I yti në tokën tënde) është i dedikuar për qytetarët e zakonshëm dhe për zgjidhjen e çështjeve bazë të jetesës: mbi 80% e aplikimeve lidhen me shtëpi dhe objekte ndihmëse, ndërsa kur përfshihen edhe banesat dhe njësitë e tjera të veçanta, përqindja tejkalon 90%.

Aspekti digjital i procesit tashmë po jep rezultate konkrete – rreth 50% e aplikimeve janë paraqitur online, dhe rreth një e treta e tyre përmes telefonave mobilë. Interes i konsiderueshëm vërehet edhe nga diaspora, veçanërisht nga Austria, Gjermania dhe Bosnje e Hercegovina.

Procesi zhvillohet me transparencë të plotë, ndërsa të dhënat mbi numrin dhe statusin e aplikimeve publikohen çdo ditë në faqen zyrtare dhe në aplikacionin “Svoj na svome”.