Qeveria e Republikës së Kosovës ka hapur një mundësi konkrete mbështetjeje për studentët nga Lugina e Preshevës, të cilët ndjekin studimet e tyre në universitetet e Kosovës.

Sipas njoftimit zyrtar, të gjithë studentët aktivë në nivelet Bachelor, Master dhe Doktoratë mund të përfitojnë nga dy masa mbështetëse financiare përmes platformës zyrtare eKosova:

✅ Shtesë e njëhershme prej 100 eurosh për çdo student aktiv; ✅ Bursa e Mobilitetit të Studentëve, e dedikuar për ata që vijnë nga familje me të ardhura vjetore nën 12,000 euro.

Afati i aplikimit është i hapur deri në fund të muajit tetor, dhe aplikimi bëhet online në platformën eKosova.

Kjo nismë synon të lehtësojë barrën financiare të studentëve dhe të mbështesë integrimin e tyre në arsimin e lartë në Kosovë, duke ofruar kushte më të favorshme për zhvillim akademik dhe profesional.

Ftohen të gjithë studentët nga Lugina e Preshevës që studiojnë në Kosovë të shfrytëzojnë këtë mundësi të rëndësishme mbështetjeje.