Kryeministrja e Ukrainës, Yulia Svyrydenko, ka njoftuar se burrat ukrainas të moshës 18 deri në 22 vjeç tani do të lejohen të kalojnë kufirin lirshëm, në të dy drejtimet, në përputhje me gjendjen ushtarake në vend.

Rregulloret e mëparshme, të vendosura pas pushtimit rus në shkurt 2022, ndalonin burrat e moshës 18–60 vjeç të largoheshin nga Ukraina.

“Kjo vlen për të gjithë qytetarët e kësaj grupmoshe. Vendimi ka të bëjë edhe me ata që, për arsye të ndryshme, ndodhen jashtë Ukrainës”, ka shkruar Svyrydenko në Telegram, duke iu referuar një dekreti të ri qeveritar.

Ajo ka theksuar se qëllimi i këtij ndryshimi është që “ukrainasit të mbajnë një maksimum lidhjesh me Ukrainën”. Ndryshimet do të hyjnë në fuqi një ditë pas publikimit zyrtar.