Një incident serioz ka ndodhur në fillim të korrikut mbi hapësirën ajrore të Detit të Kuq, ku një anije luftarake kineze ka goditur me laser një avion zbulues gjerman që po kryente një fluturim rutinë në kuadër të misionit të Bashkimit Evropian ASPIDES.

Sipas burimeve të sigurisë të cituara nga gazeta gjermane “Bild”, incidenti ndodhi pranë brigjeve të Jemenit, ndërsa avioni gjerman ishte në një mision monitorimi ajror. Goditja me laser u bë pa asnjë paralajmërim, duke rrezikuar seriozisht sigurinë e ekuipazhit.

Pas incidentit, avioni ndërpreu menjëherë misionin dhe u kthye në mënyrë të sigurt në bazën ushtarake në Xhibuti.

Reagimi zyrtar i Gjermanisë

Ministria e Punëve të Jashtme në Berlin ka reaguar me tone të ashpra, duke e quajtur veprimin e Kinës “plotësisht të papranueshëm”. Si pasojë, ambasadori i Kinës në Berlin është thirrur zyrtarisht për sqarime.

“Ushtria kineze ka shënjestruar një avion gjerman gjatë një operacioni të BE-së duke përdorur laser. Kjo ka vënë në rrezik jetën e personelit dhe ka penguar misionin. Ky veprim është i papranueshëm,” thuhet në deklaratën zyrtare të ministrisë.

Konteksti i tensionuar

Misioni i BE-së ASPIDES është vendosur për të mbrojtur transportin detar ndërkombëtar nga sulmet e rebelëve Huthi në Detin e Kuq. Kina, e cila ka një bazë ushtarake në Xhibuti, nuk është pjesë e këtij misioni dhe prania e saj në rajon shihet me shqetësim gjithnjë e më të madh nga vendet perëndimore.

Ky incident shton tensionet midis Bashkimit Evropian dhe Kinës, në një kohë kur prania ushtarake ndërkombëtare në zonën e Detit të Kuq është rritur ndjeshëm për shkak të krizës në Jemen dhe kërcënimeve ndaj sigurisë detare.

Burimi: blic.rs, transmeton a1info