Nga Redaksia A1 Info

Ndërsa flakët përfshijnë zonat malore të Preshevës – Raincën, Corroticën dhe Shoshajën – banorët luftojnë për të shpëtuar pronat dhe shëndetin e tyre. Në një situatë të tillë emergjente, kur gjithçka kërkon udhëheqje, koordinim dhe veprim të menjëhershëm institucional, Presheva mbetet pa komandë. Dhe pyetja e madhe është: Ku është zëvendëskryetari i Komunës, Ragmi Mustafa?

Sipas Nenit 42 të Ligjit për Situata të Jashtëzakonshme të Serbisë, kryetari i komunës është komandanti i shtabit komunal për menaxhimin e krizave. Në mungesë të tij/saj, zëvendëskryetari merr drejtimin dhe përgjegjësinë ligjore për të menaxhuar situatën. Por Ragmi Mustafa, përveç mungesës në terren, nuk ka dhënë asnjë deklaratë publike, asnjë shenjë angazhimi institucional – si të mos ekzistonte.

Në këtë pikë, qytetarët kanë filluar të shfaqin më shumë shqetësim për zhdukjen e zëvendëskryetarit sesa për vetë zjarret. Institucioni që duhet të japë siguri, komunikim dhe udhëzim në kohë krize, po hesht. E ndërsa Presheva digjet, zyrtarët që marrin pagë nga buxheti i saj heshtin, mungojnë dhe zhduken.

Kur pushteti kthehet në “hije”

Ragmi Mustafa, shpesh i pranishëm në fotografi zyrtare dhe në delegacione të zhurmshme, ka zhdukur çdo gjurmë publike pikërisht në ditët kur duhej të ishte më i zëshëm se kurrë. Në një vend ku të gjitha institucionet varen nga një individ i vetëm ose zëvendësuesi i tij, mungesa e tij është jo vetëm morale, por edhe juridikisht e papranueshme.

Ligji nuk është simbolik. Neni 360 i Kodit Penal të Serbisë sanksionon moszbatimin e detyrës zyrtare në rrethana të jashtëzakonshme, nëse nga kjo neglizhencë rrezikohen jetë dhe pasuri. Dhe nëse vërtetohet se autoritetet lokale nuk kanë ndërmarrë masat minimale të ligjshme, atëherë kemi të bëjmë me përgjegjësi penale – jo vetëm politike.

Presheva meriton përgjegjësi, jo “figurantë në detyrë”

Zëvendëskryetari nuk mund të jetë në pushim ose në hije në momentin që qyteti është nën kërcënim. Heshtja e tij në një situatë të tillë është fyese për qytetarët dhe një tallje me funksionin që përfaqëson.

Presheva nuk ka nevojë për politikanë ceremonialë, që vihen në lëvizje vetëm kur ka kamera, por për njerëz me përgjegjësi, të gatshëm të lënë gjithçka për të shërbyer kur qyteti ka më shumë nevojë. Në këtë krizë, as Ardita Sinani dhe as Ragmi Mustafa nuk ishin aty. Dhe ky është një dështim kolektiv i udhëheqjes lokale.

🛑 Qyteti nuk kërkon justifikime, por përgjigje. Nuk kërkon heshtje, por veprim. Dhe më së pari, kërkon përgjegjësi – me emër dhe mbiemër.

Presheva nuk është për pushim – është për t’u mbrojtur.

Ky editorial është pronë e A1 Info dhe mund të publikohet me referencë të qartë ndaj burimit.