Jerusalem, 14 qershor 2025 – Kryeministri i Izraelit, Benjamin Netanyahu, përmes një video-mesazhi të publikuar, i është drejtuar audiencës amerikane me një apel për përkrahje të mëtejshme ndaj Izraelit dhe veprimeve të tij në Lindjen e Mesme.

Në mesazh, Netanyahu e nisi fjalimin me një urim për ditëlindjen e ish-presidentit amerikan Donald Trump, duke e lavdëruar atë për mbështetjen ndaj Izraelit. Ai vlerësoi gjithashtu Shtetet e Bashkuara për “ruajtjen e lirisë për 250 vjet” dhe e krahasoi misionin e ushtrisë izraelite me atë të forcave amerikane.

“Ushtria e Izraelit po mbron lirinë në Lindjen e Mesme kundër regjimit tiranik iranian,” deklaroi Netanyahu. “Armiku ynë është armiku juaj. Dhe duke vepruar, po përballemi me një kërcënim që, herët a vonë, do të prekë të gjithë.”

Kryeministri izraelit shtoi se, nëse Izraeli nuk do të ndërmerrte veprime, Irani do të armatoste aleatët e tij rajonalë – përkatësisht Hezbollahun dhe Hamasin – me armë bërthamore.

Ai theksoi se veprimet e Izraelit po kryhen me mbështetjen e hapur të presidentit Trump dhe të popullit amerikan.

“Kjo është ajo që po bën Izraeli me përkrahjen e qartë të presidentit të Shteteve të Bashkuara, Donald Trump, dhe të shumë të tjerëve në botë,” u shpreh Netanyahu.

Fillimisht, Shtëpia e Bardhë kishte shprehur rezervë ndaj sulmeve izraelite mbi objektivat iraniane, por më pas deklaroi mbështetje të plotë për to. Ish-presidenti Trump, nga ana e tij, i cilësoi operacionet e Izraelit si “të shkëlqyera”.