Basel, 18 maj 2025 – Shqipëria ka arritur një ndër rezultatet më të mira në historinë e saj në Festivalin Evropian të Këngës, duke u renditur në vendin e 8-të në finalen e Eurovision 2025. Me një total prej 218 pikësh, dueti Shkodra Elektronike – i përbërë nga Arlind Dervishi dhe Era Leka – mahniti publikun dhe jurinë me këngën e tyre “Zjerm”.

Kënga, që përfaqësonte një përzierje unike mes tingujve elektronikë të viteve ‘80 dhe motiveve folklorike shqiptare, u përzgjodh përmes Festivalit të Këngës 63. Performanca e tyre u cilësua si një ndër më të veçantat e natës finale, duke e mbyllur konkursin në mënyrë spektakolare si akti i fundit – në pozicionin e 26-të të renditjes së performancave.

Në gjysmëfinale, Shqipëria u kualifikua me sukses, duke u renditur në vendin e dytë me 122 pikë – një tregues i qartë i pritshmërive të larta për finalen. Me një skenografi që kombinonte vizualisht traditën dhe modernitetin, “Zjerm” u përshkrua nga komentuesit ndërkombëtarë si një “rave folklorike që ndezi skenën e Basel-it”.

Austria doli fituese e Eurovision 2025 me këngën “Wasted Love” të interpretuar nga JJ, duke grumbulluar 436 pikë në total.

Ky sukses i Shqipërisë përforcon prezencën e saj në skenën ndërkombëtare të muzikës dhe tregon potencialin që artistët shqiptarë kanë për të konkurruar me dinjitet dhe kreativitet në një arenë globale.

A1 info