Preshevë, 16 maj 2025 — Përdorimi i veturës zyrtare të Komunës së Preshevës nga bashkëshorti i kryetares Ardita Sinani ka shkaktuar reagime të ashpra në opinionin publik dhe në skenën politike lokale.

Pavarësisht denoncimeve të mëparshme, mëngjesin e sotëm rreth orës 07:10, qytetarë të shumtë kanë raportuar sërish se i njëjti person është parë duke vozitur veturën zyrtare në qendër të qytetit. Sipas këshilltarit komunal Almin Shaqiri, këtë shkelje e kanë kapur edhe kamerat e sigurisë të instaluara në qendër.

Në një reagim të ashpër publik, Shaqiri ka publikuar mesazhin: “🚨SKANDAL MBI SKANDAL!!!🚨”, duke e cilësuar rastin si një keqpërdorim të përsëritur dhe flagrant të pronës publike.

“Kjo sjellje është kthyer në normë dhe vlerë morale të këtij pushteti. Tani më shumë se kurrë, organet kompetente duhet të veprojnë për të ndalur këtë degradim institucional dhe etik,” –ka shkruar Shaqiri.

Ky incident vjen vetëm disa ditë pasi u denoncua rasti i parë, duke ngritur pikëpyetje serioze për funksionimin e etikës në administratën lokale dhe për mungesën e veprimit institucional për ndaljen e këtij abuzimi.

A1