New York – Një moment historik është shënuar në selinë e Kombeve të Bashkuara, ku flamuri i revolucionit sirian u ngrit për herë të parë përkrah flamujve të 193 shteteve anëtare dhe 2 shteteve vëzhguese. Ceremonia e ngritjes u zhvillua në një atmosferë simbolike dhe emocionuese, me pjesëmarrjen e figurave të rëndësishme politike dhe përfaqësuesve të shoqërisë civile siriane.

Sipas Anadolu Agency, në ceremoni morën pjesë Ministri i Jashtëm i Sirisë, Assad Hassan Shaibani, Përfaqësuesi Special i OKB-së për Sirinë, Geir O. Pedersen, si dhe përfaqësues të përhershëm të shteteve anëtare të OKB-së dhe aktivistë të diasporës siriane në SHBA. Të pranishmit e përshëndetën ngritjen e flamurit me duartrokitje dhe brohoritje.

“Ky është një mesazh për të gjithë botën, për të gjithë njerëzit e lirë. Momenti që po përjetojmë nuk ka rëndësi vetëm për sirianët, por për të gjithë njerëzimin. Vullneti i popullit fitoi,” deklaroi Shaibani para gazetarëve. “Valëvitja e flamurit sirian në OKB është kurorëzimi i fitores së popullit tonë.”

Flamuri i ri sirian, i njohur si “flamuri i revolucionit”, është simboli i përdorur nga opozita që nga shpërthimi i luftës civile në Siri. Ai zëvendëson flamurin e mëparshëm të regjimit Baath, që kishte qeverisur vendin për 61 vjet, deri në rrëzimin e tij.

Ndërkohë, sirianë të shumtë që jetojnë në SHBA u mblodhën jashtë ndërtesës së OKB-së për të marrë pjesë në këtë moment historik, duke valëvitur flamuj dhe shfaqur emocione të forta përmes brohoritjeve.

Burimi: Anadolu Agency

Përcjell: A1 Info