Ministria e Arsimit e Republikës së Serbisë ka njoftuar se nga data 22 deri më 30 prill, nxënësit e klasës së tetë të shkollave fillore do t’i nënshtrohen testeve provuese të provimit përfundimtar në gjuhën serbe (ose gjuhën amtare), matematikë dhe një lëndë me zgjedhje. Këtë proces pritet ta kalojnë gjithsej 64.418 nxënës.

Sipas kalendarit zyrtar, testet në gjuhën amtare dhe në lëndën e zgjedhjes do të zhvillohen përgjatë javës, ndërsa testi i matematikës është planifikuar për të premten, më 25 prill, nga ora 12:00 deri në 14:00.

Po ashtu, në të njëjtën ditë do të organizohet edhe testi provues për 2.051 pjesëmarrës të përfshirë në programin e Arsimit Fillor Funksional për të Rritur.

Qëllimi i këtyre testeve provuese është të ndihmojë nxënësit të përgatiten më mirë për provimin përfundimtar që do të zhvillohet në fund të vitit shkollor, duke vlerësuar nivelin aktual të njohurive dhe identifikuar fushat ku nevojitet përmirësim.

Për testin e tretë, nxënësit janë përcaktuar më herët për njërën nga pesë lëndët: biologji, gjeografi, histori, fizikë apo kimi. Gjeografia rezulton të jetë zgjedhja më e popullarizuar këtë vit, me 46.2% të nxënësve, e ndjekur nga biologjia (31.4%), historia (9%), fizika (7%) dhe kimia (6.4%).