Hagë, 1 Prill 2025 – Zyra e Prokurorit të Specializuar ka përfunduar thirrjen e dëshmitarëve të saj në gjykimin ndaj ish-krerëve të Ushtrisë Çlirimtare të Kosovës (UÇK), Hashim Thaçi, Kadri Veseli, Rexhep Selimi dhe Jakup Krasniqi, të akuzuar për krime lufte dhe krime kundër njerëzimit.

Dëshmitari i fundit nga pala e prokurorisë pritej të dëshmonte të martën, por për shkak të pamundësisë për të qenë i pranishëm, kryetari i trupit gjykues, Charles Smith III, vendosi që seancat të shtyhen për një kohë të pacaktuar.

“Seanca e radhës nuk do të jetë më 15 prill, pasi disa persona nuk do të jenë të pranishëm. Do ta caktojmë një datë pas kësaj dhe do t’ju njoftojmë për planifikimin përkatës,” tha Smith, sipas raportimeve të “Betimi për Drejtësi”.

Në këtë proces, pritej të dëshmonte dëshmitari i 126-të nga prokuroria. Katër ish-krerët e UÇK-së janë deklaruar të pafajshëm për akuzat e ngritura ndaj tyre.

Gjykimi do të vazhdojë pas datës 15 prill, ndërsa trupit gjykues i mbetet të përcaktojë datën e seancës së radhës.