Kryeministri i Kroacisë, Andrej Plenkoviq, ka reaguar ndaj deklaratave të presidentit serb Aleksandar Vuçiq, duke theksuar se marrëveshja e fundit ushtarake me Shqipërinë dhe Kosovën nuk ka natyrë armiqësore dhe Kroacia nuk ka nevojë të kërkojë miratimin e Serbisë apo NATO-s për këtë. Plenkoviq theksoi se kjo marrëveshje është krijuar për të mbështetur përpjekjet e reformave dhe nuk është një akt që do të kërcënonte sigurinë e ndonjë shteti.

Kryeministri i Kroacisë i bëri këto komente pas kritikave të Vuçiqit, i cili kishte akuzuar Kroacinë, Shqipërinë dhe Kosovën për shkeljen e marrëveshjes së vitit 1996 dhe për hapjen e një gare armësh. Plenkoviq kërkoi që dikush të lexonte tekstin e marrëveshjes, duke shtuar se ajo është një marrëveshje e përbashkët që ndihmon në forcimin e bashkëpunimit të mbrojtjes dhe sigurisë.

Deklarata e fundit e nënshkruar më 18 mars në Tiranë, ndërmjet Kroacisë, Shqipërisë dhe Kosovës, ka shkaktuar reagime të ashpra në Serbi.