Kryetarja e Preshevës, Ardita Sinani, priti në një takim një delegacion gazetarësh nga të gjitha trojet shqiptare, të udhëhequr nga Aleksandër Çipa. Qëllimi i kësaj vizite ishte të ndriçojë realitetin dhe sfidat me të cilat përballen shqiptarët e Luginës së Preshevës.

Gjatë takimit u diskutua për diskriminimin sistematik, pasivizimin e adresave dhe mungesën e zhvillimit ekonomik në rajon. Pavarësisht sfidave, Sinani nënvizoi se po krijohen mundësi të reja për një të ardhme më të mirë.

Ajo shprehu mirënjohje për përkushtimin e gazetarëve në pasqyrimin e situatës në Luginë dhe falënderoi ambasadorin e Shqipërisë në Beograd, Bardhyl Canaj, për mbështetjen e vazhdueshme ndaj shqiptarëve të kësaj zone.

“Presheva është dhe do të mbetet pjesë e pandashme e kombit shqiptar,” përfundoi Sinani.