Skleroza multiple është një sëmundje demielinizuese apo inflamatore që e prek sistemin nervor qendror, përkatësisht trurit dhe palcën e kurrizit. Sëmundja e prek më së tepërmi moshën e re, kështu që prezantohet zakonisht ndërmjet moshës 25-35 vjeçare.
Simptomat e para të sëmundjes janë të ndryshueshme dhe mund të përmenden: humbja e mprehtësisë së të pamurit me njërin sy, mosdallimi i ngjyrave, shfaqja e shikimit çift, mpirja e njërës gjysmë të fytyrës apo e njërës pjesë të trupit, humbja e fuqisë apo paraliza e një gjymtyre apo e njërës anë, vështirësitë në të ecur, humbja e aftësisë së kontrollimit të urinës, problemet e natyrës seksuale. Në shumicën e rasteve, ankesat e para kanë të bëjnë me të pamurit.
Diagnostikimi i sklerozës multiple bëhet në bazë të simptomave e shenjave klinike, realizimit të rezonancës magnetike të trurit dhe të palcës së kurrizit, punksionit lumbal (testimit të lëngut trunoshpinor i cili merret nga beli) dhe testeve ndihmëse elektrofiziologjike (VEP, SEP). Në rreth 85% të rasteve sëmundja ka ecuri të ashtuquajtur “relapsing-remitting” – d.m.th. pacienti mund të ketë mpirje dhe paralizë të anës së djathtë dhe pasi ta merr trajtimin përkatës ato largohen; por pas një periudhe të caktuara (disa javë apo muaj) paraqiten simptoma të ngjashme apo të tjera që po ashtu duhet të trajtohen.
Rrjedhimisht, trajtimi i sëmundjes bazohet në 1) terapinë e sulmit (relapsit) që nënkupton dhënien e dozës së lartë të kortikosteroideve për ta përmirësuar gjendjen aktuale, dhe në 2) terapinë afatgjatë imunomodulatore për pengimin e përsëritjes së sulmeve dhe mbajtjen e sëmundjes nën kontroll.

A1info