Drita luan një rol qendror në jetën tonë. Në nivelin më themelor, nëpërmjet fotosintezës, drita është në origjinën e vetë të jetës. Studimi i dritës ka çuar në burime alternative premtuese të energjisë, përparime mjekësore që shpëtojnë jetë në teknologjinë dhe trajtimet diagnostikuese, internetin me shpejtësi të dritës e shumë zbulime të tjera që kanë revolucionarizuar shoqërinë dhe kanë formësuar të kuptuarit tonë për universin.
Këto teknologji u zhvilluan gjatë shekujve të kërkimit themelor mbi vetitë e dritës – duke filluar me veprën kryesore të Ibn Al-Haytham, Kitab al-Manazir (Libri i Optikës), botuar në vitin 1015 dhe duke përfshirë punën e Ajnshtajnit në fillim të shekullit të 20-të, e cila ndryshoi mënyrën se si mendojmë për kohën dhe dritën.
Dita Ndërkombëtare e Dritës feston rolin që luan drita në shkencë, kulturë, art, arsim dhe zhvillim të qëndrueshëm dhe në fusha të ndryshme si mjekësia, komunikimi dhe energjia. Festimi do të lejojë shumë sektorë të ndryshëm të shoqërisë në mbarë botën të marrin pjesë në aktivitete që demonstrojnë se si shkenca, teknologjia, arti dhe kultura mund të ndihmojnë në arritjen e qëllimeve të UNESCO-s, ndërtimin e themeleve për shoqëri paqësore.
Dita Ndërkombëtare e Dritës festohet çdo vit më 16 maj, në përvjetorin e funksionimit të parë të suksesshëm të laserit në vitin 1960 nga fizikani dhe inxhinieri, Theodore Maiman. Kjo ditë është një thirrje për të forcuar bashkëpunimin shkencor dhe për të shfrytëzuar potencialin e tij për të nxitur paqen dhe zhvillimin e qëndrueshëm.

A1info