Preshevë – Kryetarja e Komunës së Preshevës, Ardita Sinani, ka pritur përfaqësuesit e K.F. Gerajt, ekipit kampion të turneut tradicional të futbollit “Musa Musahu”, duke i uruar për suksesin dhe titullin e fituar.

Gjatë pritjes, Sinani vlerësoi arritjen e ekipit, duke theksuar se ky triumf është rezultat i punës së palodhur, përkushtimit dhe shpirtit të lartë garues të futbollistëve dhe stafit të klubit.

Ajo nënvizoi se sporti vazhdon të mbetet një ndër prioritetet e komunës, duke shtuar se institucionet lokale do të vazhdojnë të mbështesin të rinjtë dhe klubet sportive në zhvillimin e aktiviteteve dhe talenteve të tyre.

“Ky sukses është rezultat i punës, përkushtimit dhe shpirtit garues të ekipit. Sporti mbetet një nga prioritetet tona dhe do të vazhdojmë të mbështesim të rinjtë dhe klubet sportive të komunës sonë”, theksoi Sinani.

Në fund, kryetarja uroi kampionët për titullin e merituar, duke shprehur dëshirën për suksese të reja në të ardhmen.

🏆 Urime K.F. Gerajt për titullin kampion në turneun tradicional “Musa Musahu”! ⚽👏