Gjilan, 12 tetor 2025 — Ushtruesi i Detyrës së Drejtorit të Spitalit të Përgjithshëm të Gjilanit, Afrim Cana, ka konfirmuar për Gazetën Express se Fatmir Sheholli, i arrestuar ditë më parë nën dyshimet për përfshirje në spiunazh, është pranuar për trajtim mjekësor në këtë institucion shëndetësor.

Sipas drejtorit Cana, Sheholli është pranuar në emergjencën e spitalit më 11 tetor 2025, me disa ndryshime në gjendjen shëndetësore. Pas ekzaminimeve të nevojshme, ai është hospitalizuar dhe po trajtohet aktualisht në spitalin e Gjilanit.

“Pacienti është pranuar dje (11.10.2025), ka ardhur me disa ndryshime në shëndet. Pas kontrolleve që i janë bërë në emergjencën e Gjilanit, ai është hospitalizuar në spitalin e Gjilanit, ku edhe është duke u trajtuar,”

— ka deklaruar mjeku Afrim Cana për Gazetën Express.

Autoritetet kompetente ende nuk kanë dhënë detaje shtesë lidhur me gjendjen shëndetësore të Shehollit apo me kushtet e trajtimit të tij brenda spitalit. Ai ishte arrestuar disa ditë më parë nën dyshimet për përfshirje në veprimtari spiunazhi, çështje e cila aktualisht është nën hetim nga organet e sigurisë.