Bujanoc, maj 2025 – Kryetari i Komunës së Bujanocit, Arbër Pajaziti, ka mirëpritur sot përfaqësuesit e ekipeve pjesëmarrëse në Turneun Mbarëkombëtar në Futboll “Tërnoci 2025”, që këtë vit po mbahet në komunën e Bujanocit në edicionin e tij të 20-të jubilar.

Në takim morën pjesë përfaqësues nga qytetet pjesëmarrëse – Durrësi, Peja, Tetova dhe Ulqini, si dhe koordinatorët e këtij eventi gjithëkombëtar, që tanimë është kthyer në një traditë të qëndrueshme kulturore e sportive.

🗣️ “Ky është një moment i veçantë dhe një nder i madh për Komunën e Bujanocit që sivjet jemi nikoqirë të këtij turneu jubilar. Ky turne nuk është vetëm një ngjarje futbolli, por një manifestim i përbashkët i identitetit tonë kombëtar, një urë lidhëse mes shqiptarëve nga të gjitha trevat, dhe një dëshmi e fuqisë së sportit si mjet bashkimi dhe bashkëpunimi,” – theksoi kryetari Pajaziti.

Ai shtoi se për komunën organizimi i këtij eventi përfaqëson një përgjegjësi të madhe dhe një mundësi për të treguar mikpritjen, kulturën dhe energjinë rinore që e karakterizon Bujanocin.

Kryetari shprehu bindjen se turneu do të zhvillohet në frymë të garës së ndershme dhe respektit të ndërsjellë, duke sjellë mesazhe të forta uniteti dhe bashkëpunimi.

🎉 Në përmbyllje të fjalës së tij, ai uroi suksese për të gjitha ekipet pjesëmarrëse dhe falënderoi organizatorët për përkushtimin që ky turne të jetë gjithmonë në nivelin më të lartë.

⚽️ “Tërnoci 2025” – Një turne, një komb, një qëllim: bashkimi përmes sportit!